كيف تعرف المصري ؟

المصرى اصيل فى كل مكان
- لو سألت سواق تاكس على عنوان وبدل ما يدلك قالك امشي ورايا .. يبقى مصري.

وعلى فكرة ساعات بيغير اتجاهه عشان عنده رغبة صادقة يوصلك وخايف تتوه


- لو صليت في مكان وبعد الصلاة اللي جنبك مد ايده وقالك تقبل الله.. يبقى مصري


-لو سمعته بعد ما يضحك كتير يقول " خير اللهم إجعله خير " .. فتأكد أنه مصري ...


- لو دخلت عليه وكان بياكل ولو حتى عيش وبصل لازم يقولك اتفضل الأكل ويعيدها عليك ثلاث أربع مرات .. يبقي مصري

-و لما عربية تعمل حادثة فى الطريق الصحراوى أو الزراعى , و فى ثوانى تقفلها خمسين عربية ينقذوا المصابين و يعدلوا العربيات و لو اضطروا يشيلوهم من على الأرض .. هم دول المصريين

- لما تلاقي ناس بتقضي العيد فى المقابر مع حبايبهم اللي ماتوا يبقي أكيد في مصر

- لما تلاقي سيدة في الرايحة والجاية عمالة تدعي لأولادها وتخلى الدنيا كلها تدعيلهم... تبقى دي أم مصرية وطموحاتها وأحلامها الشخصية فى الحياة إن ولادها يبقوا مبسوطين

- لو شفت واحد وقف فجأة و هو ماشى فى الشارع و مد ايده على حتة عيش مرمية على الأرض وقام رافعها لراسه قبل مايحطها جنب
الرصيف... يبقى ده مصرى.

- لو شفت عامل اول ماخد اجرته قام رافعها لراسه و بص فوق و حمد ربنا قبل مايحط الفلوس فى جيبه ... يبقى مصرى.

-لو اديت لواحد فلوس وبدأ يعدها بصوت عالي وبدأ بقوله الله واحد .. ومع الورقة الثانية : مالوش تاني، ومع الورقة الثالثة: العدد ثلاثة .. يبقي أكيد مصري ابن مصري


- لما تلاقي خناقة فى الميكروباس والأصوات عليت كل واحد فيهم بيحلف إنه يدفع للتاني ثمن التذكرة





-. لما تلاقي ست البيت بتحوش برطمانات المربي الفاضية سنين طوال بدون استخدام يبقي أكيد دي مصرية

- لما يكون عندنا ضيوف ويسلموا عشان هيمشوا ويقفوا على الباب يتكلموا ساعه يبقوا مصريين مصريين

- لما تلاقى اننا شايلين اكياس من جميع الاشكال والالوان تحت المرتبه نبقى مصريين

- ولما تلاقى شعب فى اكبر ازمه بيمر بيها ... مابينساش يضحك ويطلع افيهاااات ويضحك اللى حواليه وكل العالم يتكلم عليه وعلى خفته

يبقى انت اكيد تقصد ... شعب مصر...

BEAUTIFUL EGYPT: EL GOUNA

حلم عم ادريس

كان إدريس هو خادم سمو الامير احمد فؤاد احد ابناء الخديوى اسماعيل و فى احد الايام قام ادريس من نومه علي حلم جميل أراد أن يقصه علي مولاه الأمير فقال له :يا سمو الامير لقد حلمت أنك أصبحت ملك مصر فابتسم و قال له انا بعيد كل البعد عن ذلك لان اخى السلطان حسين ولى عهده هو و ابنه الامير كمال الدين حسين و انا لا علاقة لى بحكم مصر و لكن استمر إدريس يكرر حلمه علي أفندينا مؤكدا أنه رآه يجلس علي عرش مصر في قصر عابدين فاخبره الامير و هو يضحك بأنه إذا حكم مصر سيضع صورة الفلاح إدريس على الجنيه
و توالت الاحداث و تنازل الامير كمال الدين حسين عن عرش مصر و توفى السلطان و فجأة وجد الامير فؤاد نفسه سلطانا لمصر فقابل الامراء و المندوب السامى البريطانى و الحكومة و رجال البلاط السلطانى و هو لا يصدق نفسه
فذهب الى قصره قصر الزعفران فوجد إدريس جالسا يصلى فجلس بجواره حتى انهى صلاته ثم قال له انهض يا إدريس بك واستغرب إدريس من ذلك فلم يعط الرتب والألقاب غير عظمة السلطان فكرر الامير فؤاد عليه وقال له لقد تحقق حلمك وأصبحت سلطان مصر وستكون صورتك علي أول جنيه تصدره حكومتي
و نفذ الملك فؤاد الاول وعده و اصدر جنيه ادريس الفلاح فى 8 يوليو 1928

يا اغلى اسم فى الوجود

رجعوووووووولى بلدى 1

ده احساسى و احساس ناس كتير من اللى فى سنى. طفولتى و مراهقتى كانت ايام جمال عبد الناصر, رحمه الله . كنت افتخر انى مصريه و اعتز بعروبتى. كنت اشجع منتجات بلادى ولم ينقصنا شئ . تعلمت فى مدرسه اجنبيه كانت تهتم باللغه العربيه و التربيه الدينيه. علمنى الشيخ مرزوق حب خالقى والسعى لرضاه. لم نفرق بين مسلم و مسيحى حتى ان فى حاله غياب مدرسه الدين المسيحى كانوا يحضروا معنا و كان الشيخ مرزوق يرحب بهم حتى فى مسجدنا الصغير. كنا نحتفل بكل المناسبات الدينيه اسلاميه او مسيحيه. 

كنا نسير فى الشارع دون خوف لو واحد عاكس بالكلام كانوا بيحلقولوا "صليبه". لم نسمع عن تحرش او مد ايادى لم نسمع عن الرشاوى او المرتشين  لم تكن كلمه فى قاموسنا . تعلمنا ان نحترم الكبير ونعطف على الفقير 

تعلمنا ان نحترم و نقدر الشرطه و الجيش.....ولم اعبر الطريق حتى انظر لعسكرى المرور لاستأذنه. لم ننادى بواب العماره غير ب يا عم ........

اما عن النادى كنا نحترم الكونترول .....لم نفكر فى قطف ورده او السير على الحشائش

اما الان فلا اشعر بالامان .......اسمع عن لصوص حقائب السيدات ......سيده تذبح فى منزلها صباحا .....لصوص السيرات و غيره 

ولسه كتير بس كفايه النهارده

استر يا رب 

القطار و احمد رجب

ذكريات اسكندرانى

إسكندرية لها سحر لم أجده في أي بلد في العالم.... هل هم الأهل و الأصحاب أم هو سحرُ حقيقي. أم وجود الأهل و الأصحاب في المدينة المسحورة. الحقيقة الأكل كان يمثل جزء كبير من حياتنا و كان بيت عمتي بيت كتب الله عليه البركة. في طفولتي كنا نستيقظ في الساعة ٦ لنجد وليمة الفطار المفضلة: بيض مقلي، جبنة رومي، فول ، فلافل ،لقمة القاضي و عسل و ذبدة و اهم شئ كوباية البليلة باللبن.

انطلق انا و اختي و ابن عمتي : الي محطة الترام من سيدي جابر حتي سيدي بشر . نبدأ بالمشي من طابية سيدي بشر حتي پلاچ ابو هيف. لنجد بقية شباب العائلة ينضم إلينا . اليوم راحة مش حنصتاد سمك، هذا ما قررناه. ينقسم اليوم بين السباحة و الراكيت و ركوب الپينسوار و لعب الاستيميشن و الشطرنج. و تقترب الساعة من الثانية ، و رغم أننا قد زينا بطوننا خلال النهار بالفريسكا و الكلوكلو و اللب الأبيض و السوداني و زجاجة الماكدونلدز بطعم التفاح أو التوتي فروتي الا ان الجوع قد بدأت قواته تهاجمنا. الحل طبعا في فطير الأمور : بالسدق أو باللحمة و الحلو طبعاً بالسكر أو بالعسل. أو الفراخ المشوية من عند ابو خالد بجانب جامع خالد بن الوليد .

 أكاد اجزم بل اجزم ان لو يحدث يوماً ان تسمم احد منا أو حتي حدث أي اضطراب معوي كل شئ نظيف و جميل. و نستكمل النشاط و أجمل شئ كان نزلة البحر وقت غروب الشمس.
و في ليلة من الليالي من عام ١٩٧٢ أخذنا ابن عمتي الكبير شريف في رحلة الي الإبراهيمية: عندي لكم مفاجأة عظيمة. بعد ان نزلنا الي محطة الترام مشينا لمدة ١٠ دقائق لنجد رجل في ال٥٠ من عمره يقف علي عربية و يقدم : عاشورة و مشمشية و مهلبية و رز باللبن ،

 نعم هذا هو الحاج صابر. و في بعض الليال كنا نذهب الي سينما مترو ثم نعرج الي اليت ، طبعاً قالب المكرونة فرن بالبشاميل هو المراد. أو نعرج علي شجابي لنأكل الپيتزا التي لم اكل مثلها حتي يومنا هذا .

 و من ينسي جاتوه تريانون فهو أثم و من ينسي كاساتا البوريڤاچ فهو ناكر للحق. حينما كنا نذهب مع أهلنا الي البوريڤاچ أو سان ستيفانو كان الرجال يلبسون البدل و السيدات التيرات . زمن الرقي و الشياكة. من ينسي زيفيريون في ابو قير و تراسه علي البحر: سلطة بلدي بالبصل و طماطم بالثوم ثم السبيط المقلي و البربوني و نتبعه بالجمبري المشوي و بعد ذلك...... سمك القاروص المشوي زيت و ليمون.

كم اشتاق إليكم و اشتاق لصحبتكم تركتم لي ذكري ايام و ثواني لاتنسي. عرفت السعادة بكم و معكم و كل ما انا فيه من خير فمن الله و بفضل دعائكم و تضحيتكم. انتم حبي الأول و الأخير لا يضاهيه حب..... اللهم أسكنهم جميعاً جناتك و أحشرنا معهم يوم الدين

بقلم : خالد ش

حادث قطار البدرشين و الفيس بوك

يا عينى يا ولادى و بتسألوا ليه بنتعامل زى الزباله بره البلد ... اهو بيتعامل كده فى يلده

عم صابر و برسيل

افتح الباب فى حد نازل خبط على الباب

 ايه بس ده انا ما صدقت دفيت الحتة بتاعتي في السرير...... 

ما هو ده من خيبتك مدفي حتتك بس ، قوم فز الجرس ما بطلش.......

 لا حول و لا قوة إلا بالله ، حاضر حاضر جاي الله يخرب بيتك .....

فتح صابر الباب فوجد سيدة شاهقة الجمال و وراءها رجل يحمل كاميرا و أضواء قوية و تقريباً نصف الحارة.......

 قالت الجميلة: أستاذ صابر عبد البديع هلال.....أأأ

 ايوه......

مبروك انت كسبت مع برسيل......

مش فاهم حضرتك يعني الحاج برسيخ حيقسم معايا؟؟؟......

مش حضرتك بتستعمل برسيل؟؟؟.....

أأأ أيوه اكيد، مش كسبت يبقي لامؤاخذة بنستعمل برسيخ......

 هي المدام هنا علشان نصور معاها، اكيد هي الي بتستعمل برسيل!!!......

 هو لامؤاخذة الجائزة فلوس........

 أكيد يا أستاذ صابر ١٠ جنيه دهب......

يا لهوي يا أم صابر ١٠ جنيه دهب ده حضرتك لو كنتي قلتي ١٠ جنيه بنك نوت كنت حاوطي أبوس رجلك......

أأأ العفو يا أستاذ صابر هي المدام فين؟......

الجماعة أه لأ الجماعة تعيشي انتي ، ماتت من ٥ سنين!!!!

لأ البقية في حياتك، يعني حضرتك الي بتغسل للعيال؟.....

 أأأه ان الغسالة، اقصد انا الي بأغسل....

 يعني حضرتك كده الأب المثالي يعني تكسب كمان ٥ جنيه دهب......

يا لهوي يا لهوي يا لهوي انا كده حبوس رجل الراجل الطيب الي شايل الكمرا....

عيب يا أستاذ صابر احنا بنصور......

ما تأخذنيش يا بنتي اصل انا جتتي اتلبشت.......

 معلش و لا يهمك، تعرف تزغرط يا أستاذ صابر علشان دي حته مهمة لازم تتصور .....

ازغرط بس ، حضرتك تحبي ارقصلك السمسمية اواعملك الهوبا بتاعت فيفي عبده.....

 ها ها ها لا زغروطة بس علشان الكاميرا......

لولولولولولولي ......

 أتفضل آدي ال ١٥ جنيه دهب.........

مين الي بره يا منيل؟؟؟؟؟.......

 مين دي يا أستاذ صابر انا سامعة صوت واحدة ست.......

 لا لامؤاخذة ده الرفأ بتاعي، نورتي يا مدام .......

الف مبروك سلام عليكم.....

الف سلامة الف سلامة.....

دخل صابر الي الحجرة وجد زوجته جالسة في السرير و شعرها ملفوف في بُكل و بنس......

ايه الدوشة دي و ايه الزيطة الي انت عاملها دي ، انت عبيط علشان تزغرط انا عارفة صوتك ، اوعي تكذب، اكيد كنت بتعاكس البنت المفقعة بنت أو عيطة يا ابو ذوق زي وشك يا عرة الرجالة يا كيس المخدة ......

عنايات، عنايات.....

عايز ايه يا زفت اكيد حتلكك و تدب أي خناقة علشان تتسرسب و تنزل القهوة ما انا عارفاك....... 

انتي طالق يا عنايات

بقلم : خالد ش

Egypt: Marsa Allam in December

RESTA GRAND RESORT 

http://www.restaresorts.com/hoteldetails.aspx?pageid=26