انا عندي واحد قريبي في المجلس العسكري قالي ان النجاة من الموقف الي إحنا فيه في القطر الابيض!!!! إيه القطر الابيض .....ايوه و حيوصل محطة مصر يوم الجمعة الساعة ١٢.....
سمعت ياد يا سالم... إيه يا ولا...بيجولك ان الجتر الابيض الي حيوصل يوم الجمعة هو الي حينجد البلد ... اهههيه...
بت يا عواطف... إيه يا ابلتي .... بلاش تتقفي علي اي فرح يوم الجمعة كلنا يا بت حنروح محطة مصر يوم الجمعة نستني الاتر الابيض علشان نشوف الي حينجد مصر.....
السلام عليكم يا شيخ محمد.... و عليكم السلام و رحمة الله و بركاته يا شيخ علي... موعدنا ان شاء ربك الكريم يوم الجمعة في محطة مصر لعل الله مخرجنا من ما نحن عليه... و نعم بالله طب و الصلاة يا شيخنا...نصلي هناك ان شاء الله....
يا أوديت يا أوديت في محطة مصر يوم الجمعة الرب حيرعانا و ينقذنا و مع الرب ذلك افضل كثيرا...الرب يجمعنا يا حبيبتي اشوفك هناك.........
يا اسحابي.... عايز إيه يا مان.... كلنا پيكنيك يوم الجمعة لمحطة الترين و ماتنسوش الكوفي...هي زيزي عارفة ....اه و كل الشلة ... اوعي تكون بتأفلم علينا... نو بيبي سي يو
المشهد: محطة مصر و كل الشعب يقف هناك ...لامكان لقدم اخر... كانه يوم الحشر.... و يصل القطار الابيض علي الرصيف و يطلق صوت مدوي إبلاغا عن وصوله و تتهافت الناس لرؤية القطار و راكبه الذي جاء لينقذ البلد من كبوتها
و ينفتح الباب الثاني للقاطرة الرابعة من الدرجة الثالثة و تنزل طفلة جميلة في السابعة من عمرها ... وجهها مضيئ و سط خصل الشعر الاسود ... مصرية تقطيعها مصرية ...... و يصيح الجميع : من انتي و ما قصة القطار الابيض و كيف ستنقذينا !!!!!!!!!!!!!!!
و ترد الطفلة : مش مهم من انا.... المهم ان انتم كلكم اتجمعتم هنا..... في محطة مصر
بقلم: خالد
No comments:
Post a Comment