مصــــر
يا حتة عايشة جوة جوايا
يا فرحى..وترحى
يا سعدى حتى ف شقايا
ياللى لو ضحكتى
تطير جتتى فوق سمايا
ولو بكيتى
تبكى طيور السما ويايا......
يانيل بيجرى كما الدم ف الشريان
شايل الحب
من إسكندرية لحد أسوان
بيروى الحب لجل ماتطلع له أغصان
ويسقى الحب ف قلب كل إنسان......
يا هرم واقف قدام الزمن رافع راسه
يحكى قصة المصرى وكل ناسه
وحكاية فلاح بياكل من عرق راسه
ومهندس علم الناس البـُنا وأساسه........
يا معبد على أرضها وكنيسة وجامع
يا أول طوبة إتبنت ف المصـــانع
أيام ماكان كل شعب ف الأرض ضايع
كنت إنتى
أرض الحضارة و حـَبك ف الصوامع..........
يا مصر
يا شمس طول السنة
يا نسمة حلوة حنينة...
ياللى عن الشر حافظك ربنا
إوعى تزعلى من ولادك ولا منى أنا
ساعات بننسى...ساعات بنقسى
بس والله يا حبيبتى أنا
بنرجع نبوس إيديكى
ونحنى بدموعنا رجليكى
ونقول ماكانش قصدنا...
سامحينا....
سامحينا يامصر...دة إنتى برضة أمنا......
إدوارد المصرى —,
No comments:
Post a Comment