هانشتكيكى يا قوطة لمين

حتى انتى ياللى اسمك قوطة.. بتذلى فينا ومبسوطة.. 
حرام عليكى يا مجنونة.. خليكى عاقلة ومظبوطة..

عاملنا أزمة وشبورة.. وبقيتى فى السوق مشهورة.. 
وكل يوم طالعة فى جرنال.. ومنزلك كام صورة..

بقى ليكى سعر وليكى قيمة.. يا مفعصة وعاملة سليمة.. 
مش بعيد بعد شوية.. نشوف جنابك فى السيما..

من امتى وانتى بعشرة جنيه.. 
والناس غلابة هاتعمل إيه..

بقيتى أغلى من التفاح..
ومنفضة لنا وعاملة بهية..

مجنونة أكتر من العادة..
والحالة جاتلك بزيادة..

يارب أشوفك يا طماطم 
من السراية واخدة شهادة..

ده حتى شكلك مش هو..
وبايظة خالص من جوه..

رضينا وانتى معندانا..
واخدة الأمور عافية وقوة..

حرام عليكى خنقتينا 
وبأى حق تذلينا.. 

من بعد ما دخلتى فى أزمة.. 
الكل بقى يلعب بينا..

هانشتكيكى يا قوطة لمين»

وعجبى