بيقولك واحد سمع إن فيه
مطعم فراخ حلو قوي قوي
فاتح جديد ..
قالك هاروح أشوف إيه
النظام
راح لقى مطعم تحفه
ومليان ناس وعباره عن عماره من خمس أدوار
دخل أول دور وسأل الجرسون:
- فيه فراخ ؟
* أيوه يا فندم موجود .. حضرتك عاوز مشوي ولا محمر ؟
-لا عاوز مشوي
* طيب يا فندم معلش حضرتك إطلع الدور التاني فيه الفراخ
المشويه
قال سبحان الله إيه النظام المحترم دا .. لا وإيه يا جماعه
الجرسونات كتيررررر ولابسين لبس حلو قوي وبيتكلموا كلام محترم
طلع الدور التاني وقال للجرسون:
- لو سمحت أنا عاوز فراخ مشويه
* تحت أمرك يا فندم .. حضرتك عاوز فراخ مشوية في الفرن ولا
على الفحم يافندم ؟
- عاوز على الفحم
* طيب آسف جداً يافندم هاتضطر إنك تطلع الدور إللي فوق دا
علشان هنا فراخ مشويه فرن
طبعاً الزبون فرح بس وقال الله أكبر هو دا المطعم إللي الواحد بيدور
عليه .. واضح ومحدد والواحد يعرف بعد كدا هو عاوز إيه وهايلاقيه
وخلاص .. الغريبه إن المطعم فاضي ومفيهوش زباين .. كلهم عمّال
وبس .. لكن قال في سره أكيد علشان النظام الزبون بييجي
وبيمشي بسرعه يعني وكدا :)
أول ماقعد على الترابيزه كلم الجرسون وقاله:
أول ماقعد على الترابيزه كلم الجرسون وقاله:
- أنا عاوز آكل فراخ مشويه على الفحم
* عينيا الإتنين يافندم طيب حضرتك تحب فرخه كامله ولا نص فرخه
ولا ربع يافندم ؟
- أنا عاوز ربع أصل عامل ريجيم بعيد عنك
* طب معلش يا فندم الأرباع المشوية على الفحم الدور إللي فوق
دا .. حضرتك أكيد فهمت النظام بأه
- تمام تمام الله ينور عليكم .. حاضر هاطلع أهه
وبالفعل .. طلع الراجل الدور الرابع وهناك سأل الجرسون وقاله:
- عاوز ربع فراخ مشوي على الفحم بأه .. مش هنا برضه ؟؟
*أيوه يافندم تمام تمام .. حضرتك عاوز ورك ولا صدر ؟
- لا أنا بحب الأوراك بصراحه
* طب يافندم آخر حاجه معلش هاتطلع فوق وتلاقي طلبك إن شاء
الله
- حااااااااااااااااااااااااا
وطلع الراجل في الدور الأخير وهو بينهج .. فرحته بالدقه قلت
واتحولت لإرهاق وقرف، ولمّا طلع هناك لقى واحد قاعد على مكتب
مفيش غيره .. قابله بابتسامه عريضه ووجه بشوش كدا وقاله :
* منور يا أستاذنا أهلاً وسهلاً أهلاً وسهلاً
- أهلاً بيك يا سيدي .. أنا عاوز ربع فراخ مشوي على الفحم ورك
* طب ارتاح شويه إحنا آسفين على الطلوع يعني كل الأدوار دي
كلها
- لا ولا يهمك يا سيدي المهم ألاقي طلبي .. دا أنا سمعت إن
عندكوا الفراخ تجنن بصراحه .. الإعلانات مغرقه الدنيا
* والله يافندم للأسف إحنا معندناش فراخ .. دا كلام تمهيدي كدا ..
بس قوللي بأه إيه رأيك في النظام :D :D :D
آه .. طبعاً نسيت أقولكوا اسم المطعم .. مطعم "النهضه"
آه .. طبعاً نسيت أقولكوا اسم المطعم .. مطعم "النهضه"
No comments:
Post a Comment