سينا تالت
صحابى بيقولوا لى إستعوض بقى ربنا
سألت ف إيه؟؟
ماهى الخساير كتير عندنا
قالوا ف أرض الفيروز
أم التمر زى اللوز
اللى حاربنا عشانها كلنا
وسال على أرضها دم ..من شهيد وجع قلب أم
ورجعناها تانى بعد طول صبرنا
دخلوها دلوقتى ناس مش مننا
فردوا على أرضها الخيام
واحنا تايهين وسط الزحام
وبقينا شــاطرين ف ضــرب بعضنا
وكمان منع الكنايس م البنا
وتانى ..وتالت...وعاشر
قتلوا تلاتة م العساكر
وسال ع الأرض دمهم..اللى هو دمنا
وكل دة عشان مناخدش بالنا
من دستور طالع لينا ولعيالنا
عايزين يطلعوه ..وطظ فينا وف رأينا
ولا عشان نخاف ونغمض عينينا
ع اللى بيحصل فيكى يا سينا
ياحتة غالية علينا ...ياست أرضنا
يا واجعة قلوبنا م الخوف عليكى
ياريت ياحلوة برموشى أغطيكى
لجل ما حميكى م الديابة ياشرق مصرنا
يا حلوة ف رملتك
ونخلة بترمى تمرتك
ياللى البحر حاضن شطك وضفتك
إوعاكِ ياسينا تهجرينا وتزعلى مننا
يوووووه
دة احنا تعبنا لحد مارجعناكِ
جايين شوية ديابة تنهش صباكِ
عايزين يجوزوكى شايب مش من أصلنا
ولا يعرف سلو عرضنا
ولا يفهم شرفنا وعزنا
صحيح بنتخانق شوية مع بعضنا
بس نموت كلنا ولا كلب يدوس على أرضنا
من غير مانقول لُه خش...ونديلـُه إذننا
وإفهموا بقى...
ياهوامش...لقيت نفسها وسطنا
مرفوضين إنتوا....
وملعونين من كل واحد من شعبنا
إدوارد المصرى
إدوارد المصرى
No comments:
Post a Comment