قوم ياراجل قوم انت مالك مستأتل ليه!!...
فيه ايه يا ولية ما تسيبيني أنام انا من
الصبح في المصلحة
و بعد كده ٩ ساعات و انا بلف علي
لقمة عيشي بالتاكس...
قوم يا منيل في صوت بره اكيد في حرامي......
حرامي ...حرامي ايه ده اكيد مغفل هو احنا حيليتنا راديو ....
قام عم امين و في ايده الشبشب و خرج و كانت المفاجأة انه وجد
حرامي في الصالة....ضحك امين و هو يودع اخر اثار النوم :
هاهاهاهاهاها تكونش حرامي ، ده انت فعلا حرامي....
رد الغريب بصوت اجش :ايوه حرامي و سفاح كمان....
و بجلالة قدرك ما لقيتش غيري علشان تسرقه ... اقعد
اقعد يا راجل أعملك شاي...
خيم الذهول علي زائر الفجر و هو يري صاحب المنزل يأتي له
بالشاي و بعض البسكويت البيتي....
تسرق مين يا راجل اقعد اقعد مافيش اجدع من قعدة
الرجالة... بقي انا يا سيدي محسوبك امين ٢٤ سنة خدمة في
شركة النصر للسيارات و مرتبي و بدلاته و تحابيشه ٩٣٤
جنيه و ٦٧ قرش و بأجر تاكسي ب ٨٠ جنيه علشان الف به، يوم
اعملي فوق الإيجار ٢٠ جنيه يوم ٣٠
و كام يوم ما بجبش إيجار التاكس . بدفع إيجار البيت ٢٠٠ جنيه ....
و هنا قاطعه اللص: ٢٠٠ جنيه في الحوء ده ....
اه و الله يا معلم .. و ميه و نور ٥٠ جنيه و خد عندك مصاريف دروس
للبنت الي نائمة معانا جوه في القوضة و الواد الي بايت عند
صاحبه بقاله ٣ سنين من قلة القوض عندنا ١٥٠ جنيه يتبقي معايا
٥٨٤ جنيه و ٦٧ قرش و قول التاكس بيجبلي حوالي ٣٠٠ و دول
اكل و اشرب و أعيش بيهم... ده انا بطلت السجائر و القهوة بقالي
٧ سنين....
نظر الحرامي بنظرة كلها عطف و قال له بكل حسرة: انا أسف
يا عم امين....
يا عم سيبك خلينا في القعدة الحلوة دي قولي انت
انتخبت مين يا ريس....
و الله انا انتخبت مرسي اصل انا برضه لامؤاخذة موظف زي سيادتك
، انت بتلف بالتاكس بالليل و انا برضه باشوط الشقق بالليل، و انا
كنت حاسس ان الراجل ده حيحس بينا و يمكن يغنينه بالحلال.
و انت يا عم امين انتخبت مين؟ ....
مرسي و حياتك و لنفس الأسباب .....
و تفتكر يا عم امين حيعملنا حاجة؟؟؟؟
و حياة الي جابوه لو معملش انا و انت حنتقابل عنده في القصر و
معانا ٤٠ مليون جعان
طب يا عم امين ما يلزمش اي خدمة...
اه انت مش قلت انك حرامي و سفاح!!!!!
الحقيقة انا اضطريت في كام ظرف أني
اخلص علي كام واحد كده انت فاهم كل شغلانة و لها
متطلباتها.....
رد امين: و النبي و لو فيها رزالة تدخل بدون تكليف تخلص
علي الي فوق السرير الي تحت علي الارض دي بنتي سيبها و
بكده حتوفرلي بتاع ١٩٠ جنيه و ٦٧ قرش و بكده اقدر ارجع
للسجائر ......
بقلم: خالد ش
No comments:
Post a Comment