بقلم : مروه فتاه مصريه
علشان العرب و المسلمين يحرروا القدس لازم "يتحرروا" هما الاول من النظم الديكتاتورية اللتي حمتهم و الفساد اللي متفشي فيهم ، و لازم يعيدوا بناء بلادهم و يبنوا دول قوية اقتصاديا و علميا و سياسيا ، لازم يتحرروا من الجهل و الامية و يرتقوا بالتعليم و يتجهوا للبحث العلمي و يواكبوا كل ما هو جديد في مجالات العلوم و التكنولوجيا ، لازم يبقوا دول قوية لها سيادة و لها كلمة مسموعة ، دول ما بتخدش معونات و لا تعليمات من دول كبري ! و لازم يكون عندهم جيوش قوية مستعدة متسلحة باحدث الاسلحة ، و يكون عندهم جيش عربي موحد و سوق عربية مشتركة ...... الطريق طويل محتاج سنوات و سنوات !!
الشيخ صفوت حجازي شايف ان" بكرة مرسي ها يحرر القدس" و ده ملوش غير 3 معاني : اما ان مرسي ها يحكمنا سنوات و سنوات "لما شاء الله" زي مبارك كده عشان نكون استعدينا احنا و كل العرب لتحرير القدس ! و اما ها نتهور و نحاول نحرر القدس خلال الاربع سنوات اللي ها يكون مرسي رئيس فيهم ، بما نحن فيه من امكانيات اقتصادية و سياسية و تعليمية و حربية متواضعة او قولوا منتهية !!! و اما ان يكون الشيخ صفوت يقول مجرد هتافات و شعارات ليلهب حماس الشباب و هذا غير مقبول طبعا !!
ربنا سبحانه و تعالي قال في كتابه الكريم :
"وأعدوا لهم ما استطعتم من قوة ومن رباط الخيل ترهبون به عدو الله وعدوكم" فهل اعددنا لتحرير القدس ما استطعنا ؟؟!!
و يقول " واعتصموا بحبل الله جميعا ولا تفرقوا " فهل نحن كعرب او حتي كشعب مصري متحدين علي قلب رجل واحد نستطيع بوحدتنا ان نرهب اعدائنا و نحرر القدس ؟؟!!
كلنا مسلمين و عرب حاسين بالخزي و العار علي فلسطين و علي القدس المحتلة و بنحلم نحرر القدس و نصلي فيها بس مش ها نعمل كده بالهتافات و الشعارات ! ها نعمل كده بالعمل و العلم و القوة و يجب ان نقود الشباب بهذا الفكر و هذا الهدف مش بالهتافات !! كفانا مزايدات !! ارحموا شباب مصر !!
No comments:
Post a Comment