دستور يا سياد...يا قاعدين فوق الأنظــار....
إسمعونى ..دة أنا مصرى مش م التتار......
بيقولوا لى نعم يعنى الجنة والإستقرار.....
ولأ...يا حبيبى راح تمرمطك وتوديك النار....
وانا راجل بسيط
فلاح...وأخويا صنايعى نجار.....
لا بنفهم ف السياسة..ولا كنا ف الدراسة شطار....
فهمونا..علمونا..وبلاش تموتونا ولا الكفار....
إحنا كل اللى بنعرفه...فاس وشاكوش ومنشار.....
وحامدين ربنا ع الرغيف والبصلة وحبة خضار....
لا لبسنا بـِدل..ولا سهرنا ف نوادى
و فاكهتنا...قوطة وخيار.................
فهمونا ياعالم...مخنا من كدبكم خلاص طار......
إيه دخل ربنا..ف لعبة السياسة بين الكبار......
وكل واحد يرمى بياضـُه...وسيبونا ياناس نختار......
والأرض الفاضية واسعة...وإنتوا ليه زانقين الجار....
وكمان عايزين تبنوا حوالينا ألف جــدار....
لجل السجن مايكبر وإحنا جواه يدوب حبة أنفار....
والسجان فوق السور
ماسك كرباج وساطور
وبيسمع كلامـُه عم الشاويش عبد الجبار.......
إضرب يا شاويش
دول فلول..ودول ديول..
ودول عيال مليانين طيش
والضهر المحنى شيال
أصبر يابو العيال......لابد فى جاى نهار........
آه يابلد مابقتش شايفانا
الفقير بقت العيون عنه عميانة
والكـُل حاطط بس ع الكرسى ألف منظـــار.......
وانا إبن مصر الغلبان
بقول لكم أنا منكم تعبان
وخلاص....خلص الصبر ووقت الكدب والهزار.....
وإذا ماشفش همى الحاكم
وإن كانت الجنة من ظالم
أنا بقول عاوز عدل ولو رحت حتى للنار.....
عشان عدل ربنا...أهون علىّ من جنة بشر جبار.....
إمضـــاء
فلاح...وعامل...وموظف بسيط...ومعاهم ست الدار
إدوارد المصرى
No comments:
Post a Comment